Tarixiy qadriyatlar, ajdodlarning ma’naviyati va madaniyatini namoyon etuvchi o`zbek liboslarini faqatgina milliy urf-odatlarni targ`ib etuvchi tadbirlarda, teatrning tarixiy sahnalarida, “Navro`z” ayyomida yoki to`y marosimlaridagi sarpolarda ko`rishga ko`nikib qolgan edik. Bu nafis matodan tikilgan liboslarni jozibasini yoqtirsakda, kiyishni sog`insakda, yelkamizga bir tashlab, yana chetga taxtlab qo`yaverardik. Bugunga kelib haftaning har juma kunida davlat va nodavlat tashkilotlarida faoliyat yuritayotgan hamyurtlarimizni milliy libosda ko`rib ko`zimiz quvnamoqda. Xususan milliy qadriyatlarimizni keng targ`ib qilish, an’analarimizni asrab-avaylash hamda milliy liboslarimizning kundalik hayotimizdagi o`rnini mustahkamlash maqsadida “Sharg`unko`mir” AJda haftaning har juma kuni  «Milliy liboslar kuni» etib belgilandi.

Milliy liboslar kuni – bu millatimizga xos bo`lgan an’analarni, madaniyatni va urf-odatlarni hurmat qilish, yodga olish hamda o`zaro birdamlikni mustahkamlash uchun ajoyib imkoniyatdir. Bu kunni belgilovchi har birimiz milliy libosda ishtirok etib, o`z hayotimizda milliy qadriyatlarimizning ahamiyatini yanada yaxshiroq anglashimiz mumkin.

Ushbu kunda korxonaning ayol xodimalari o`z ish joylariga milliy liboslarda kelishi tavsiya etilmoqda. 

Liboslar – har bir xalq tarixi bilan uzviy bog`liq bo`lib, u milliy o`ziga xoslikni aks ettiradi. Liboslar turli etnik belgilari bilan ham ajralib turadi.  Uzoq tarixni bosib o`tgan, ajdodlarimiz mafkurasi va dunyoqarashi haqida so`zlaydigan milliy liboslarimizni saqlab qolish, targ`ib etish va milliyligimizni unutmaslik maqsadida tashkil etilgan «Milliy liboslar kuni»da maxsus kiyimlar joriy etilgan jamoadagi xotin-qizlar milliy ornamentlardan foydalanishlari mumkin.

“Sharg`unko`mir” AJ matbuot xizmati