O`zbekiston Respublikasi Prezidentining 2025-yil 15-maydagi “2025-2026-yillarda sayyohlar oqimini keskin ko`paytirish va turistik xizmatlar ko`lamini jadal kengaytirish orqali turizmning iqtisodiyotdagi o`rni va ahamiyatini oshirish chora-tadbirlari to`g`risida” PF-87-son farmoniga asosan, joriy yilning 18-19-20-iyulь kunlari “Sharg`unko`mir” AJ ma’muriyati hamda boshlang`ich kasaba uyushma qo`mitasi tashabbusi bilan “Sharg`unko`mir” AJda mehnat qilayotgan 50 nafar ishchi-xodimlar “Yangi O`zbekiston bo`ylab sayohat qil!” shiori ostida Samarqand va Shahrisabz shaharlariga sayohat tashkil etildi.

Sayohat davomida sayohatchilar qadim Samarqand va Shahrisabzning tarixi va mustaqillik yillarida barpo etilgan bunyodkorlik inshootlari bilan yaqindan tanishdilar.

Dastlab sayohatchilar Samarqand shahrida bo`lib, Mirzo Ulug`bek rasadxonasi, Hoja Doniyor va Amir Temur qabrlari ziyorati bilan boshlanib, “Boqiy Samarqand” majmuasini aylanish bilan davom etdi.

Sayohatchilar tarixiy obidalar, ulardagi naqshinkor bezaklar, ganchkorlik namunalari, ota-bobolarimizning ilm-fan taraqqiyotidagi qudrati va donishmandligi, insoniyat taraqqiyotiga ulkan hissa qo`shganligiga yana bir bor guvoh bo`ldilar.

Shuningdek, Samarqandning noyob me’moriy obidalari hamda davlatimiz rahbari tashabbusi bilan shaharda barpo etilgan madaniy-ma’rifiy inshootlar, sayilgohlar va shaharda qad ko`tarayotgan binolarni tomosha qildilar.

“Boqiy shahar” majmuasiga borgan sayohatchilar qalbida yana bir bor milliy g`urur uyg`ondi. Buni ularning quvonchga to`lgan ko`zlarida va o`zaro suhbatlarida ko`rish mumkin edi.

Shu o`rinda aytish kerakki, “Boqiy shahar” majmuasi, Kongress xoll, 8 ta zamonaviy mehmonxona, amfiteatr va ko`plab boshqa ob’yektlardan iborat bu muhtasham markazning barpo etilishi azim Samarqand ko`rkiga yanada fayzu tarovat bag`ishlagan.

Sayohatchilar ikkinchi kuni ko`hna Shahrisabz shaxrida bo`lib,  Oqsaroy majmuasiga borishdi. Sohibqiron Amir Temur Shahrisabz shahrida bir qancha obidalar barpo ettirgan bo`lib, ulardan bittasi Oqsaroydir. Saroyning ko`lami ajoyib bo`lgan. Oqsaroy Amir Temurning yozgi qarorgohi bo`lgan. Saroyning hovuzlari Taxcha qoracha dovonidan sopol quvurlar orqali suv keltirilgan. Bugungi kunda saroydan faqat Samarqand shahriga qaratib qurilgan balandligi 40 metrga yetadigan asosiy darvoza kirish qismi, ya’ni portallari saqlangan. Portallarning hozirgi balandligi 38 metrni tashkil etadi, uning ravoqi eni esa 22,5 metr bo`lib, kattaligi jihatidan Markaziy Osiyoda yagona hisoblanadi. Mana shuning o`ziyoq qadimda Oqsaroyning salobati qanday bo`lganligini namoyon etib turibdi. Darvozaning tashqi qismini bezab turgan mozaika o`zining xilma-xilligi bilan ulkan geometrik naqshlarni hosil qilib, insonni hayratga soladi. Beqiyos yodgorlikning buyukligini o`z ko`zlari bilan ko`rish uchun bu yerga minglab sayyohlar kelishda davom etmoqda.

Ko`hna va hamisha navqiron shahar deya ta’rif beriladigan Shahrisabzning tarixi va keyingi yillarda bu yerda amalga oshirilayotgan bunyodkorlik ishlari uning shuhratini yanada oshirayotganiga sayohatchilar guvoh bo`ldilar.

Samarqand va Shahrisabz shaharlariga tashkil etilgan sayohat barchada iliq taassurot qoldirdi.

Mansur Danayev

“Sharg`unko`mir” AJ boshlang`ich kasaba uyushma qo`mitasi raisi