Ижтимоий тармоқларда Сурхондарё вилояти Сариосиё туманида жойлашган “Шарғункўмир” АЖга тегишли кўмир конида ишлаб чиқариш жараёнларига жалб қилинган “Amikam International Group Co., Limited” Хитой компаниясида ишловчи ўзбек фуқаролари номидан йўлланган мурожаат юзасидан чет эл компанияси маъмурияти томонидан қуйидагилар маълум қилинган.

2023 йил 21 сентябрда лойиҳа доирасида янги кўмир қазиб олиш технологиясини ишга тушириш мақсадида “Шарғункўмир” АЖ ва “Amikam International Group Co., Limited” Хитой компанияси ўртасида тегишли шартнома имзоланиб, шартнома шартларига асосан “Amikam International Group Co., Limited” Хитой компанияси (Пудратчи) томонидан 2 йил мобайнида кўмир қазиб чиқариш комплексини ишлатган ҳолда белгиланган кўмир ҳажмларини қазиб чиқарилишининг таъминланиши белгиланган.

Ушбу комплекс ёрдамида кўмир қазиб чиқариш жараёнларига хитойлик мутахассислардан иборат ходимлар ҳамда қўшимча ишчи ўринларини яратган ҳолда маҳалий фуқаролар жалб қилиниб, улар билан белгиланган тартибда меҳнат шартномалари тузилган ва иш ҳақи хориждан келган ҳамда маҳаллий ишчи ходимларга тегишли меҳнат шартномаси шартларига мувофиқ тўланади.

Комплекснинг технологик жиҳатдан мураккаб тизим ва қурилмалардан иборат эканлиги ва жалб қилинган ишчиларнинг билим ва кўникмаларини босқичма-босқич ошириб борилиши талаб этилишини ҳисобга олган ҳолда жалб қилинган маҳаллий ишчилар билан меҳнат шартномаларининг муддати иш берувчи -Хитой компанияси ҳамда ишчи ўртасида тузиладиган меҳнат шартномаларида белгиланади. Маълум қилинишича, Хитой компанияси томонидан 2024 йил ноябрь ва декабрь ойлари учун мавжуд қарздорлиги тўлиқ тўлаб берилди ва айрим техник сабаблар туфайли тез кунларда 2025 йил январь ойи учун мавжуд қарздорликни узиш чоралари кўрилади.