“Фейсбук” ижтимоий тармоғида пост эълон қилинган бўлиб, ушбу постда гўёки “Шарғункўмир” АЖ ишчи-ходимлари иш ҳақи тўловлари кечикиши сабабли иш ташлашган видеоси келтирилган.
Ҳолат аслида эса бошқача содир бўлган:
11.09.2024 йил куни эрталаб “Шарғункўмир” АЖ ишчи-ходимлари эмас балки, “Шарғункўмир” АЖ билан пудрат шартномаси асосида янги технологияда кўмир қазиб чиқаришга жалб этилган Хитойнинг «Amikam International Group Co., Limited» компаниясининг 1-сменада ишлаши лозим бўлган 25-30 нафар ишчи-ходимлари иш-ҳақи тўловлари кечикканлигини сабаб қилиб ишлашдан бош тортишган.
«Amikam International Group Co., Limited» компаниясининг ишчи-ходимлар олдидаги иш ҳақи тўловлари бўйича 2024 йил июл ойининг 2-ярми учун қарздорлиги 670,0 млн.сўм ни ташкил қилган бўлиб, бугунги 12.09.2024й ҳолатига тўлиқ тўлаб берилди.
Маълумот учун: «Amikam International Group Co., Limited» компаниясининг асосий ишчи-ходимлари маҳаллий фуқаролар бўлиб, уларнинг ҳозирги кундаги ўртача иш ҳақи 8-12 млн.сўм атрофида.
Ушбу ҳолат бўйича 11.09.2024й куни эрталаб “Шарғункўмир” АЖ ҳамда «Amikam International Group Co., Limited» компанияси раҳбарияти ҳамда сменага кириб ишлашдан бош тортган ходимлар иштирокида йиғилиш ўтказилиб, иш ҳақи тўловлари халқаро пул ўтказмаларидаги банк операциялари сабабли кечикиб турганлиги, 1-2 кун ичида тўлаб берилишини, август ойи ойлик иш ҳақи тўловлари ҳам сентябр ойининг охиригача тўлаб берилиши тушунтирилди.
Келтирилган видеомурожаатда 5 ойдан буён иш ҳақи тўловлари тўланмаётгани айтиб ўтилган бўлиб, ушбу маълумот ҳақиқатга зид эканлигини таъкидлаб ўтмоқчимиз, жумладан “Шарғункўмир” АЖ томонидан барча иш ҳақи тўловлари август ойида тўлаб берилган, «Amikam International Group Co., Limited» компанияси томонидан эса ярим ойлик иш ҳақи тўловлари бўйича қарздорлик мавжуд бўлиб, ушбу қарздорлик ҳам тўлиқ тўлаб берилди.
1-сменада кўмир қазиб чиқариш ишлари Хитойлик мутахассислар томонидан давом эттирилди ҳамда ҳозирги вақтда кўмир қазиб чиқариш ишлари бир маромда давом этмоқда.
Шу билан бирга, охирги пайтларда “Шарғункўмир” АЖ фаолияти ҳақида ижтимоий тармоқлар орқали ҳар хил нотўғри, ёлғон ва асоссиз маълумотлар тарқатиш, “Шарғункўмир” АЖ томонидан берилган маълумотларни нотўғри талқин қилиш ҳолатлари учраётганлигини маълум қилган ҳолда нотўғри мақсадларда тарқатилаётган ушбу маълумотларга ишонмаслигингизни сўраймиз.
«Шарғункўмир» АЖ маъмурияти